2 Samuel 1
1ⲁⲥϣⲱⲡⲉ ⲇⲉ ⲛⲧⲉⲣⲉⲥⲁⲟⲩⲗ ⲙⲟⲩ ⲇⲁⲩⲉⲓⲇ ⲁϥⲕⲟⲧϥ ⲉϩⲓⲟⲩⲉ ⲛⲥⲁ ⲡⲁⲙⲁⲗⲏⲕ ⲁⲩⲱ ⲇⲁⲩⲉⲓⲇ ⲁϥϩⲙⲟⲟⲥ ϩⲛ ⲥⲉⲕⲉⲗⲁⲕ ⲛϩⲟⲟⲩ ⲥⲛⲁⲩ 2ϩⲙ ⲡⲙⲉϩϣⲟⲙⲛⲧ ⲇⲉ ⲛϩⲟⲟⲩ ⲉⲓⲥ ⲟⲩⲣⲱⲙⲉ ⲁϥⲉⲓ ⲉⲃⲟⲗ ϩⲛ ⲧⲡⲁⲣⲉⲙⲃⲟⲗⲏ ⲏ ⲉⲃⲟⲗ ϩⲙ ⲡⲗⲁⲟⲥ ⲛⲥⲁⲟⲩⲗ ⲉⲣⲉⲛⲉϥϩⲟⲉⲓⲧⲉ ⲡⲏϩ ϩⲓⲱⲱϥ ⲁⲩⲱ ⲉⲣⲉⲧⲉϥⲁⲡⲉ ⲙⲉϩ ⲛⲓⲧⲛ ⲛⲧⲉⲣⲉϥⲡⲱⲧ ⲇⲉ ⲉϩⲟⲩⲛ ϣⲁ ⲇ︤ⲁ︦ⲇ︥ ⲁϥⲡⲁϩⲧϥ ⲁϥⲟⲩⲱϣⲧ ⲛⲁϥ ⲉϫⲙ ⲡⲕⲁϩ 3ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲛⲧⲁⲕⲉⲓ ⲛⲧⲱⲛ ⲡⲉϫⲁϥ ⲛⲁϥ ϫⲉ ⲛⲧⲁⲓⲣⲃⲟⲗ ⲁⲛⲟⲕ ϩⲛ ⲧⲡⲁⲣⲉⲙⲃⲟⲗⲏ ⲙⲡⲓ︤ⲏ︦ⲗ︥ 4ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲟⲩ ⲡⲉ ⲡⲉⲓϣⲁϫⲉ ⲁϫⲓϥ ⲉⲣⲟⲓ ⲡⲉϫⲁϥ ⲛⲁϥ ϫⲉ ⲡⲗⲁⲟⲥ ⲁϥϭⲱⲧⲡ ϩⲙ ⲡⲡⲟⲗⲉⲙⲟⲥ ⲁⲩⲱ ⲁⲩⲙⲏⲏϣⲉ ϩⲉ ⲉⲃⲟⲗ ϩⲙ ⲡⲗⲁⲟⲥ ⲁⲩⲙⲟⲩ ⲡⲕⲉⲥⲁⲟⲩⲗ ⲁⲩⲱ ⲓⲱⲛⲁⲑⲁⲛ ⲁⲩⲱ ⲛⲉϥϣⲏⲣⲉ ⲁⲩⲙⲟⲩ 5ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲙ ⲡϣⲏⲣⲉ ϣⲏⲙ ⲡⲉⲧⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ϫⲉ ⲉⲕⲥⲟⲟⲩⲛ ⲛⲁϣ ⲛϩⲉ ϫⲉ ⲁⲥⲁⲟⲩⲗ ⲙⲟⲩ ⲙⲛ ⲓⲱⲛⲁⲑⲁⲛ ⲡⲉϥϣⲏⲣⲉ 6ⲡⲉϫⲉⲡϣⲏⲣⲉ ϣⲏⲙ ⲛⲇⲁⲩⲉⲓⲇ ϫⲉ ϩⲛ ⲟⲩϩⲉ ⲁⲩϩⲉ ϩⲙ ⲡⲧⲟⲟⲩ ⲛⲅⲉⲗⲃⲟⲩⲉ ⲁⲩⲱ ⲉⲓⲥ ⲥⲁⲟⲩⲗ ⲛⲉϥⲧⲁϫⲣⲏⲩ ⲉϫⲛ ⲧⲉϥⲗⲟⲅⲭⲏ ⲉⲓⲥ ⲛϩⲁⲣⲙⲁ ⲇⲉ ⲙⲛ ⲛⲉⲧϩⲓϫⲛ ⲛⲉϩⲧⲱⲱⲣ ⲁⲩⲧⲁϩⲟϥ 7ⲁϥⲕⲧⲟϥ ⲉⲡⲁϩⲟⲩ ⲙⲙⲟϥ ⲁϥⲛⲁⲩ ⲉⲣⲟⲓ ⲁϥⲙⲟⲩⲧⲉ ⲉⲣⲟⲓ ⲡⲉϫⲁⲓ ⲛⲁϥ ϫⲉ ⲉⲓⲥ ϩⲏⲏⲧⲉ ϯⲙⲡⲉⲓⲙⲁ 8ⲡⲉϫⲁϥ ⲛⲁⲓ ϫⲉ ⲛⲧⲕ ⲛⲓⲙ ⲛⲧⲟⲕ ⲡⲉϫⲁⲓ ⲛⲁϥ ϫⲉ ⲁⲛⲅ ⲟⲩϩⲙϩⲁⲗ ⲛϩⲁⲙⲁⲗⲏⲕⲓⲧⲏⲥ ⲁⲛⲟⲕ 9ⲡⲉϫⲁϥ ⲛⲁⲓ ϫⲉ ⲁϩⲉⲣⲁⲧⲕ ϩⲓϫⲱⲓ ⲛⲅⲙⲟⲟⲩⲧ ϫⲉ ⲁⲩⲛⲟϭ ⲛⲕⲁⲕⲉ ϩⲱⲃⲥ ⲉⲃⲟⲗ ϩⲓϫⲱⲓ ϫⲉ ⲧⲁⲯⲩⲭⲏ ⲧⲏⲣⲥ ⲛϩⲏⲧ ⲁⲛ 10ⲁⲓⲁϩⲉⲣⲁⲧ ϩⲓϫⲱϥ ⲁⲓⲙⲟⲟⲩⲧϥ ϫⲉ ⲛⲉⲓⲥⲟⲟⲩⲛ ϫⲉ ⲛϥⲛⲁⲱⲛϩ ⲁⲛ ⲙⲛⲛⲥⲁ ⲉⲧⲣⲉϥϩⲉ ⲁⲩⲱ ⲁⲓϥⲓ ⲛⲧⲉϭⲣⲏⲡⲉ ⲉⲧϩⲓϫⲛⲧⲉϥⲁⲡⲉ ⲁⲩⲱ ⲡⲉⲕⲗⲁⲗ ⲉⲧⲉⲛϩⲟⲩⲛ ⲉⲡⲉϥϭⲃⲟⲓ ⲁⲓⲉⲛⲧⲟⲩ ⲉⲡⲉⲓⲙⲁ ⲉⲣⲁⲧϥ ⲙⲡⲁϫⲟⲉⲓⲥ 11ⲇⲁⲩⲉⲓⲇ ⲇⲉ ⲁϥϯⲧⲟⲟⲧϥ ⲉⲛⲉϥϩⲟⲉⲓⲧⲉ ⲁϥⲡⲁϩⲟⲩ ⲁⲩⲱ ⲛⲕⲉⲣⲱⲙⲉ ⲧⲏⲣⲟⲩ ⲉⲧⲛⲙⲙⲁϥ ⲁⲩⲡⲉϩⲛⲉⲩϩⲟⲉⲓⲧⲉ 12ⲁⲩⲱ ⲁⲩⲧⲟⲉⲓⲧ ⲁⲩⲛⲏⲥⲧⲉⲩⲉ ϣⲁ ⲡⲛⲁⲩ ⲛⲣⲟⲩϩⲉ ⲉϫⲛ ⲥⲁⲟⲩⲗ ⲁⲩⲱ ⲉϫⲛ ⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲉϫⲙ ⲡⲗⲁⲟⲥ ⲛⲓⲟⲩⲇⲁ ⲁⲩⲱ ⲉϫⲙ ⲡⲗⲁⲟⲥ ⲙⲡⲓ︤ⲏ︦ⲗ︥ ⲉⲃⲟⲗ ϫⲉ ⲁⲩⲡⲏⲩⲅⲏ ϩⲛ ⲟⲩⲥⲏϥⲉ 13ⲡⲉϫⲉⲇ︤ⲁ︦ⲇ︥ ⲉϩⲟⲩⲛ ϩⲙ ⲡϣⲏⲣⲉ ϣⲏⲙ ⲡⲉⲧⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ϫⲉ ⲛⲧⲕ ⲟⲩⲉ ⲉⲃⲟⲗ ⲧⲱⲛ ⲛⲧⲟⲕ ⲡⲉϫⲁϥ ϫⲉ ⲁⲛⲅ ⲡϣⲏⲣⲉ ⲛⲟⲩⲣⲱⲙⲉ ⲛⲣⲙⲛϭⲟⲉⲓⲗⲉ ⲛϩⲁⲙⲁⲗⲏⲕⲓⲧⲏⲥ 14ⲡⲉϫⲉⲇ︤ⲁ︦ⲇ︥ ⲛⲁϥ ϫⲉ ⲙⲡⲉⲕⲣϩⲟⲧⲉ ⲛⲧⲟⲕ ⲉⲉⲛⲧⲟⲟⲧⲕ ⲉϫⲙ ⲡⲉⲭ︤ⲥ︥ ⲙⲡϫⲟⲉⲓⲥ 15ⲁⲩⲱ ⲇⲁⲩⲉⲓⲇ ⲁϥⲙⲟⲩⲧⲉ ⲉⲟⲩⲁ ⲛⲛⲉϥϩⲙϩⲁⲗ ⲉϥϫⲱ ⲙⲙⲟⲥ ⲛⲁϥ ϫⲉ ϯ ⲙⲡⲉⲕⲟⲩⲟⲓ ⲉϩⲟⲩⲛ ⲉⲣⲟϥ ⲛⲅⲣⲁϩⲧϥ ⲛⲅⲧⲁⲩⲟϥ ⲁⲩⲱ ⲁϥⲡⲁⲧⲁⲥⲥⲉ ⲙⲙⲟϥ ⲁϥⲙⲟⲟⲩⲧϥ 16ⲡⲉϫⲉⲇⲁⲩⲉⲓⲇ ⲉϩⲟⲩⲛ ⲉϩⲣⲁϥ ϫⲉ ⲡⲉⲕⲥⲛⲟϥ ϩⲓϫⲛ ⲧⲉⲕⲁⲡⲉ ⲉⲃⲟⲗ ϫⲉ ⲧⲉⲕⲧⲁⲡⲣⲟ ⲧⲉ ⲛⲧⲁⲥⲣⲙⲛⲧⲣⲉ ϩⲁⲣⲟⲕ ⲉⲕϫⲱ ⲙⲙⲟⲥ ϫⲉ ⲁⲛⲟⲕ ⲡⲉ ⲛⲧⲁⲓⲙⲟⲩⲟⲩⲧ ⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ 17ⲁⲩⲱ ⲇⲁⲩⲉⲓⲇ ⲁϥⲧⲟⲉⲓⲧ ⲙⲡⲉⲓⲧⲟⲉⲓⲧ ⲉϫⲛ ⲥⲁⲟⲩⲗ ⲁⲩⲱ ⲉϫⲛ ⲓⲱⲛⲁⲑⲁⲛ ⲡⲉϥϣⲏⲣⲉ 18ⲁϥϫⲟⲟⲥ ⲉⲧⲥⲁⲃⲉⲛϣⲏⲣⲉ ⲛⲓⲟⲩⲇⲁ ⲉⲡⲉⲓⲧⲟⲉⲓⲧ ⲉⲓⲥ ϩⲏⲏⲧⲉ ϥⲥⲏϩ ⲉⲡϫⲱⲱⲙⲉ ⲙⲡⲉⲧⲥⲟⲩⲧⲱⲛ ⲏ ⲛⲧⲙⲉ ⲉϥϫⲱ ⲙⲙⲟⲥ 19ϫⲉ ⲁϩⲉⲣⲁⲧⲕ ⲡⲓ︤ⲏ︦ⲗ︥ ⲉϫⲛ ⲛⲉⲛⲧⲁⲩⲙⲟⲩ ⲉϫⲛ ⲛⲉⲧⲱⲉⲓ ⲛⲧⲟⲟⲧⲕ ⲛⲧⲁⲩⲣⲁϩⲧⲟⲩ ⲟⲩ ⲧⲉ ⲑⲉ ⲛⲧⲁ ⲛⲉⲇⲩⲛⲁⲧⲟⲥ ϩⲉ 20ⲙⲡⲉⲣⲧⲁⲩⲉⲡⲁⲓ ϩⲛ ⲅⲉⲑ ⲁⲩⲱ ⲙⲡⲉⲣⲧⲁϣⲉⲟⲉⲓϣ ⲙⲡⲁⲓ ϩⲓ ⲛⲉϩⲓⲟⲟⲩⲉ ⲛⲁⲥⲕⲁⲗⲱⲛ ⲙⲡⲉⲣⲧⲣⲉⲩⲟⲩⲛⲟϥ ⲉϫⲙ ⲡⲁⲓ ⲛϭⲓ ⲛϣⲉⲉⲣⲉ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲙⲏⲡⲟⲧⲉ ⲛⲥⲉⲧⲉⲗⲏⲗ ⲛϭⲓ ⲛϣⲉⲉⲣⲉ ⲛⲛⲉⲓⲁⲧⲥⲃⲃⲉ 21ⲛⲧⲟⲩⲉⲓⲏ ⲉⲧϩⲛⲅⲉⲗⲃⲟⲩⲉ ⲙⲡⲉⲣⲧⲣⲉϯⲱⲧⲉ ⲉⲓ ⲉϫⲱⲟⲩ ⲁⲩⲱ ⲛⲛⲉϩⲟⲩⲙⲡⲉ ⲉⲓ ⲉϫⲛⲧⲏⲩⲧⲛ ⲁⲩⲱ ⲉϫⲛ ⲛⲉⲥⲱϣⲉ ⲉⲧⲥⲟⲧⲡ ϫⲉ ⲛⲧⲁⲩϩⲉ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲛϭⲓ ⲛⲑⲩⲣⲱⲛ ⲛⲛϫⲱⲱⲣⲉ ⲡⲉⲑⲩⲣⲱⲛ ⲛⲥⲁⲟⲩⲗ ⲙⲡⲟⲩϩⲓⲧϥ ⲛⲟⲩⲛⲉϩ 22ⲉⲃⲟⲗ ϩⲙ ⲡⲉⲥⲛⲟϥ ⲛⲛⲉⲛⲧⲁⲩϣⲟⲟϭⲟⲩ ⲉⲃⲟⲗ ϩⲙ ⲡⲱⲧ ⲛⲛⲉⲇⲩⲛⲁⲧⲟⲥ ⲧⲡⲓⲧⲉ ⲛⲓⲱⲛⲁⲑⲁⲛ ⲙⲡⲉⲥⲕⲟⲧⲥ ⲉⲡⲁϩⲟⲩ ⲉⲥϣⲟⲩⲉⲓⲧ ⲁⲩⲱ ⲧⲡⲓⲧⲉ ⲛⲥⲁⲟⲩⲗ ⲙⲡⲉⲥⲕⲟⲧⲥ ⲉⲡⲁϩⲟⲩ ⲉⲥϣⲟⲩⲉⲓⲧ 23ⲥⲁⲟⲩⲗ ⲙⲛ ⲓⲱⲛⲁⲑⲁⲛ ⲙⲙⲉⲣⲁⲧⲉ ⲁⲩⲱ ⲉⲛⲉⲥⲱⲟⲩ ⲙⲡⲟⲩⲱⲣϫ ⲉⲃⲟⲗ ⲛⲛⲉⲩⲉⲣⲏⲩ ⲉⲛⲉⲥⲱⲟⲩ ⲉⲩⲟⲓ ϩⲙ ⲡⲉⲩⲱⲛϩ ϩⲙ ⲡⲉⲩⲕⲉⲙⲟⲩ ⲟⲛ ⲙⲡⲟⲩⲡⲱⲣϫ ⲉⲃⲟⲗ ⲛⲛⲉⲩⲉⲣⲏⲩ ⲉⲩⲁⲥⲱⲟⲩ ⲉϩⲟⲩⲉ ⲉⲛⲁⲉⲧⲟⲥ ⲉⲁⲩⲧⲁϫⲣⲟ ⲟⲛ ⲉϩⲟⲩⲉ ⲉϩⲛⲙⲟⲩⲓ 24ⲛϣⲉⲉⲣⲉ ⲙⲡⲓ︤ⲏ︦ⲗ︥ ϫⲓⲣⲓⲙⲉ ⲉϫⲛ ⲥⲁⲟⲩⲗ ⲣⲓⲙⲉ ⲉϫⲛ ⲡⲉⲧϯϩⲃⲥⲱ ⲛⲕⲟⲕⲕⲟⲥ ⲉϫⲛⲧⲏⲩⲧⲛ ⲙⲛ ⲡⲉⲧⲛⲕⲟⲥⲙⲟⲥ ⲡⲉⲧϯϩⲛⲓⲉⲡⲛⲟⲩⲃ ⲉϫⲛ ⲛⲉⲧⲛϩⲉⲃⲥⲟⲟⲩⲉ 25ⲟⲩ ⲧⲉ ⲑⲉ ⲛⲧⲁⲛⲉⲇⲩⲛⲁⲧⲟⲥ ϩⲉ ϩⲛ ⲧⲙⲏⲧⲉ ⲙⲡⲡⲟⲗⲉⲙⲟⲥ ⲟⲩ ⲧⲉ ⲑⲉ ⲛⲧⲁⲕϩⲉ ⲓⲱⲛⲁⲑⲁⲛ ϩⲙ ⲡⲁϣⲁⲓ ⲛⲛⲉⲛⲧⲁⲕⲣⲁϩⲧⲟⲩ 26ϯⲙⲟⲕϩ ⲛϩⲏⲧ ϩⲓϫⲱⲕ ⲡⲁⲥⲟⲛ ⲓⲱⲛⲁⲑⲁⲛ ⲁⲕϣⲱⲡⲉ ⲉⲕⲥⲟⲧⲡ ⲉⲙⲁⲧⲉ ⲛⲧⲟⲟⲧ ⲡⲉⲕⲙⲉ ⲁϥϣⲱⲡⲉ ⲉⲩϣⲡⲏⲣⲉ ⲡⲉ ⲛⲧⲟⲟⲧ ⲉϩⲟⲩⲉ ⲉⲩⲙⲉ ⲛⲥϩⲓⲙⲉ 27ⲟⲩ ⲧⲉ ⲑⲉ ⲛⲧⲁⲛⲉⲓϫⲱⲱⲣⲉ ϩⲉ ⲁⲩⲱ ⲁⲩϩⲉ ⲉⲃⲟⲗ ⲛϭⲓ ⲛⲉⲩⲥⲟⲧⲃⲉϥ ⲙⲙⲓϣⲉ
Copyright information for
CopSahBible2